26 يوليو، 2016



معدل الارتداد "Bounce Rate"

موضوع مهم لازم تقرأه
هنتكلم النهارده عن معدل الارتداد واثره في السيو ونظرة جوجل له
معدل الارتداد ببساطة شديدة هو ارتداد الزائر عن موقعك بعد الدخول عليه بسرعة والسبب ان الموقع بتاعك مش عاجبه وانت في اللحظة دي خسرت الزائر ده واحتمال قليل جداً أنه يدخل موقعك تاني يعني تعتبر خسارة كبيرة جداً لك لو اتكرر الموضوع ده كتير ومش من ناحية الزائر بس لكن من ناحية جوجل كمان لأنها هتعاقبك في النتائج.
كيف تعرف نسبة معدل الارتداد لموقعك ؟
يمكنك معرفة نسبة معدل الارتداد من خلال عملية بسيطة جداً كالتالي 
نسبة معدل الارتداد = عدد الزوار المرتدين \ عدد الزوار الكلي = الناتج (×100 ) %
او من خلال لوحة التحكم الخاصة بموقعك في Google Analytics
النسب الطبيعية لمعدل الارتداد ..
بالتأكيد كل ما كانت النسبة أقل كان هذا أفضل والنسبة الجيدة لمعدل الارتداد اقل من او يساوي 40% وكلما كانت أكثر من ذلك كانت أسوأ وطبعاً النسب بتختلف من موقع لموقع لأن المواقع مختلفة في نظامها وشكل محتواها وما في نسب دقيقة لمثل هذه المعدلات.
طبعاً زي ما تكلمنا قبل كدا أن جوجل بتعظم الزائر جداً وبتوفر كل الامكانيات وبتصدر تحديثات وقوانين جديدة كل فترة وطبعاً التحديثات دي بتكون ضدنا كأصحاب مواقع لكن بتساعد علي تقديم أفضل خدمة للزائر 
وزيادة معدل الارتداد مثلاً لموقع Content .
ويصل لـ 70% و 80% تعرف علي طول أن الموقع دا فيه مشكلة من ناحية الزوار وطبعاً دا خطر جداً سواء من ناحية السيو ومن ناحية الربح كذلك.
الحل للموضوع ده ايه بقا ..
الحل بسيط جداً حط نفسك مكان الزائر وشوف ايه الحاجات ال بتكرهك في الموقع ده 
وطبعاً الأسباب الشائعة والمعروفة للموضوع ده هي
-القالب السيء : ودا طبعاً من أهم الأسباب للموضوع ده القالب السيء كفيل أن يطرد الزوار من موقعك بكل معني الكلمة اوقات بدخل مواقع واقيم التصميمات بتاعتها بشوف عجائب والله حاجات يعني أستغفر الله العظيم  تصميمات سيئة جداً وفي الآخر يقول انا عايز أتصدر النتيجة الأولي مش عارف ازاي بصراحة.
والحل يا سيدي هو اختيار قالب بسيط وسهل وجميل وممتع طبعاً هتقول المواصفات دي صعبة لا يا باشا مش صعبة ولا حاجة أنت بس تشوف مصمم حلو وتطلب منه المواصفات وهو هينفذ وصدقني القالب المجاني دا مش من مقامك خالص  لأنه بصراحة عيب عليك بس ممكن يمشيك ممكن بقا تشوف تصميمات لمواقع كبيرة ومعروفة وتبدأ تجيب أفكار منها.
- المحتوي : الحاجة ال الزائر عايزها منك وهي المحتوي بصراحة مش عارف أتكلم فيه علي ايه لأان معظم كلامي تقريباً كان علي المحتوي وكيفية تحسينه أعتقد أن المحتوي الحصري هو الناجح في العملية دي محتوي حصري مميز يكون شيق وممتع لأقصي حد طبعاً في بعض الأشخاص بيقول أن بكتب مقالات 1000 كلمة و 3000 كلمة ومفيش نتائج زيادة عدد الكلمات مش كل حاجة يا دكتور صحيح أنها مهمة بس فيه عوامل تانية بردق تقدر تقولي متوسط قرآءة لزائر لمقالاتك دي قد ايه ؟! هل زادت مدة بقاء الزائر في موقعك ولا ايه هل المقالة 3000 كلمة دي الزائر قرأها في قد ايه وهل استمتع بيها ولا لا أسئلة كتيرة لازم تحطها في دماغك لأن المحتوي مش عدد كلمات وبس
وأيضاً لا تنسي وضع الصور الجيدة وبشروط السيو كما ذكرنا عشرات المرات وأيضاً مقاطع فيديو وروابط داخلية ...الخ لزياة مدة بقاء الزائر لأطول فترة ممكنة وكفي ..
-سرعة تحميل الموقع : احصائية كنت قرأتها قبل كدا أن 47% من مستخدمي الانترنت يتوقعون وقت تحميل الصفحة أقل من ثانيتين هل موقعك سريع التحميل عشان أختصر عليك في العامل ده مستحيل يتصدر موقع النتيجة الاولي وهو بطيء في التحميل عشان كده لازم تراجع الموضوع ده وتهتم به أوي يعني.
عشان ما نطول طبعاً في طرق كتيرة لخفض هذه المعدل زي تحسين الموقع للموبايل وتوافق الموقع مع المتصفحات ومنظومة عرض الاعلانات والأخطاء مثل هذه الأشياء التي تقابلنا بصفة دورية..
أظن كدا كفاية أوي لاننا طولنا في البوست ده
الخلاصة : لازم تموت نفسك شغل وتعب وجهد وصبر عشان تحسن موقعك للزائر دا طبعاً بتكون نهايته كويسة وغالباً المواقع ال بتكون بنية الربح فقط بتكون فاشلة أو مش ناجحة بالدرجة المطلوبة ..
أعرف أكتر عن معدل الارتداد من خلال الرابط التاليhttps://support.google.com/analytics/answer/1009409?hl=fr
كتب هدا المقال محمد ايمن على صفحته